Nga Esmeralda Hida
Pandemia dhe tërmeti rritën nevojën e qytetarëve për ndihmë ekonomike dhe shëndetësorë, por qeveria duke keqmenaxhuar fondet ka lënë popullin në mëshirë të fatit. Sipas të dhënave të publikuara nga Eurostat, qeveria jonë në të gjithë zëra, ka shpenzuar më pak për shëndetësinë dhe ndihmat ekonomike.
Kështu ne renditemi në vendin që shpenzon më pak për shëndetësinë, ndihmat ekonomike dhe arsimin, tre zërat bazike për mirëqenien e qytetarëve. Sipas një raporti të publikuar nga “Open Data Albania”, në Shqipëri shpenzohet 146 euro për frymë, ndërsa në europë 1,914 euro për frymë, 13 herë më shumë se në vendin tonë. Ndryshe nga çka pretendon dhe deklaron qeveria, shpenzimet për shëndetësinë nuk kanë njohur rritje të mjaftueshme, duke lënë qytetarët në mëshirë të fatit dhe më të rrezikuar përball koronavirusit.
Ne qëndrojmë po kaq dobët edhe në shpenzimet për çështje ekonomike. Sipas të dhënave që ka nxjerr Eurostat për vendet e Europës dhe Ballkanit sërish ne qëndrojmë më dobët. Në europë qeveria shpenzon 1,204 euro për banor, ndërsa në Shqipëri shpenzon vetëm 144 euro/frymë, pra jemi 8.36 herë më dobët se ata.
Sikur është vënë shpesh në dukje edhe nga organizatat ndërkombëtare, në Shqipëri nuk bëhen shpenzimet e nevojshme për arsimin. Në vendin tonë shpenzohet vetëm 159 euro/ frymë për këtë zë, ndërsa në Europë minimalja është 1,274 euro/banorë, 8 herë më shumë se ne. Arsimi është një nga sektorët që po merr më shumë kritikat për keqmnenaxhimin, sidomos në vitet e fundit kur duket që ky sektor po shkon drejt shkatërrimit dhe nuk po përmirësohet.
Hendeku më i thellë mes shpenzimeve që bën qeveria jonë në raport me vendet europiane duket në zërin e mbrojtjes sociale. Konkretisht, në një shtet europian shpenzohen 5, 256 uro/ frymë, ndërsa në Shqipëri vetëm 455 euro për banorë, pra ne jemi 12 herë më dobët. Këtu lind pyetja se ku i çon qeveria paratë që mblidhen nga taksapaguesit, kur qytetarëve iu mungojnë investimet për nevojat bazë.
Më dobët se Kosova
Shqipëria renditet në vendet më keq në menaxhimin e shpenzimeve edhe në raport me vendet e rajonit. Madje në zërat kryesorë ne jemi dhe më dobët se Kosova, edhe pse jemi formuar si shtet shumë vite më parë dhe presim që të na marrin shembull. Sipas të dhënave të publikuara nga “Open Data Albania”, në arsim Kosova investon më shumë se qeveria shqiptare, konkretisht në Kosovë shpenzohen 174 euro/ frymë, ndërsa në vendin tonë 159 euro/frymë.
Edhe në sektorin e Shëndetësisë ne nuk qëndrojmë më mirë se Kosova, shifrat janë gati të barabarta, ndërsa kushtet paraqiten më keq në vendin tonë. Konkretisht, në Kosovë shpenzohen 142 euro për banorë, pra ne jemi vetëm 0.02 herë më shumë. Sa i përket shpenzimeve për çështjet ekonomie, Kosova qëndron shumë përpara nesh. Atje investojnë 200 euro më shumë se në vendin tonë.
Të gjitha këto të dhëna hedhin poshtë propagandat e qeverisë se në vitin e shkuar dhe në 2020 rritën shpenzimet buxhetore për shkak se investuan në shëndetësi, në fakt ky sektor është lënë “me sytë nga qielli”, duke bërë që ne të vuajmë dhe pasojat më të rënda shëndetësore dhe ekonomike për shkak të pandemisë.
