Qeveria vendosi që të bëjë të detyrueshme përdorimin e maskës në Shqipëri kudo, në ambiente të jashtme apo të brendshme.
Gjatë konferencës për shtyp ditën e sotme me ministren e Shëndetësisë, Ogerta Manastirliu, kryeministri Rama tha se kontrollin e qytetarëve do të bëjnë policia bashkiake dhe ajo e shtetit. Nëse dikush kapet pa maskë, ai do të gjobitet dhe shuma do t’i kalojë si detyrim tek fatura e energjisë elektrike.
“Nga java e ardhshme, maska do të jetë e detyrueshme kudo. Përveç shtëpisë dhe restorantit apo barit ku je ulur në tavolinë për të konsumuar atë pjesë të ushqimit që merr. Gjoba do të apikohet tek fatura e dritave. Për bizneset, gjoba do të vilet siç është vjellur deri tani. Për ata që ankohen për gjobën, mjafton që të mos e marrë. Ne nuk mund të rrezikojmë shumë për disa persona që edhe ata janë të shumtë. Duhet të luftojmë shumë që të mos mbyllim sërish Shqipërinë, shkollat, bizneset etj., sepse e dimë shumë mirë çfarë pasojash ka kjo. Maska nuk ka qenë as këtu dhe as në vende të tjera e detyrueshme jashtë. Nuk është konsideruar edhe domosdoshme nga ekspertët. Është një temë që është diskutuar çdo ditë në botë
Duhet të kemi parasysh që me ftohjen e sezonit, me uljen e temperaturave, me spostimin e masave të njerëzve nga jashtë brenda dhe me rritjen e njerëzve që rrinë në mjedise të mbyllura apo ajrin e kondicinuar, rrezikshmëria e infektimit rritet në mënyrë eksponenciale. Duhet t’i qendrojmë strikt rregullit të ri që do të vendosim nëse nuk duam që të rimbyllemi. Një mbyllje e përgjithshme nuk do të kursejë askënd. Kështu që më mirë sot të hedhim një hap tjetër, të jemi të gjithë bashkë dhe solidarë, se sa nesër të gjendemi brenda mureve dhe të shikojmë rihapjen e kanalit prej nga do të rrjedhin në drejtim të paditur të ardhurat e familjes. Mos harroni që kemi angazhuar gjithçka për të përballuar pasojat e tërmetit“, vijoi kryeministri.
