Detaje tronditëse janë zbardhur nga jeta e Ajet Lleshit, 28- vjeçarit që plagosi me thikë nënën e tij. Ngjarja që tronditi Tiranën ndodhi orëve të paradites me 7 mars, ndërsa një grua u gjet në rrugë me plagë thike në shpinë. Kalimtarët janë përpjekur t’i japin ndihmën e parë, ndërkohë që më pas është dërguar në Spitalin e Traumës, ku tashmë është jashtë rrezikut për jetën.
Në fakt ashtu siç e tha edhe në dëshminë e tij, Ajeti është rritur mes urrejtjes dhe ka parë krime të bëhen para syve të tij. I riu përshkruhet nga familjarët jo vetëm si një person me probleme të shëndetit mendor, por edhe si dikush që u rrit pa prindërit e për këtë kishte përfunduar i pastrehë. Dosjet e prokurorisë tregojnë se Ajet Lleshi, ishte katër vjeç kur e ëma vrau të atin e me pas ajo përfundoi në burg për tetë vitet e ardhshme. E motra sipas burimeve i rrëfen prokurorisë se gjatë kohës që ata të dy po rriteshin nga gjyshërit nga ana e babait, ata i thoshin shpesh fëmijës që duhet ta vriste nënën.
Burimet sqarojnë se kur gruaja doli nga burgu u përball me dhunën e të birit e për këtë arsye ajo u largua në një qytet tjetër ku edhe krijoi familje të re. Në sistemin TIMS rezulton se në 16 shtator 2011 Safije Lleshi kërkoi ndihmë në polici për shkak të dhunës së vazhdueshme nga i biri, që ndërkohë i braktisur edhe nga gjyshërit në një rast ishte shtruar në spitalin psikiatrik. Me sa duket ky i fundit, i nxitur dhe nga gjyshërit, nuk do ia falte kurrë nënës që i vrau babanë. Vetë ai është shprehur në polici se nuk e fal gjakun e babait.
