Zv ministri Bejtja: Punëtorët të ankohen të kompani dhe Avokati i Popullit
Punonjësit e kompanisë ARMO prej ditësh janë në protesta pasi që prej 8 muash nuk kanë marrë pagat. Në kushte kur kompania azere, pronare e ARMO e ka braktisur atë edhe qeveria është vënë në një pozitë të vështirë. Zv/ministri i Energjisë dhe Industrisë, Ilir Bejtja thotë se bëhet fjalë për një çështje komplekse dhe se një grup pune I ngritur nga qeveria po punon për një zgjidhje të të gjithë problematikës së kompanisë së naftës dhe jo vetëm për pagat e punonjësve. “Zgjidhja duhet të jetë e tillë dhe nuk mund të jepet vetëm për pagat. Bëhet fjalë për një kompani private. Punëtorët duhet të bëjnë presion te kompania, Avokati i Popullit dhe sindikatat dhe jo te qeveria. Grupi i punës i ngritur nga qeveria kishte një afat dymujor, por afati është shtyrë dhe ne ende nuk e kemi një zgjidhje” ka deklaruar Bejtja. Heany Assets Corporation që në gusht të vitit 2013 mori në pronësi 85 për qind të aksioneve të ARMO-s, e ka braktisur atë dhe ka ndërprerë cdo kontakt me qeverinë shqiptare. ARMO, pronë e ish biznesmenit Rezart Taci është kompania me borxhin më të madh në vend, prej të cilit realisht është e falimentuar.
