Nga Anila Hoxha
Në shtëpinë e familjes Lala, në fshatin Rubjek (rrugës për në Gjirin e Lalëzit), fytyra e prerë e Zyhra Lalës shfaqet mes një çadre të vendosur në oborr prej tërmetit dhe një shtëpie të dëmtuar.
“Kriminelja” e zgjedhjeve të 2017, është një 25 vjeçare e shkolluar për shkenca ekonomike, por e papunë. E vetmja që sjell të ardhura në familjen prej gjashtë anëtarësh, është e motra, megjithëse e shkolluar edhe ajo punon pjatalarëse.
Në shtëpinë e kësaj familjeje shteti nuk trokiti ndonjëherë për t’i ndihmuar. Askush nuk i pyeti a kishin nevojë pas tërmetit, para pensionit që ju doli skandaloz, gjatë marrjes së pronave, pagimit të energjisë elektrike.
“Në orën 4 të mëngjesit ra porta. “Policia e shtetit!”-, thanë. Menduam mos vëllai kishte bërë sherr, menduam ç’ka ndodhur. “Hajdeni ju thamë”-, pëshpërit Zyraja duke treguar vizitën nëpër natë.
“I pyeta çfarë ka ndodhur, i pyeti babi, i pyeti mami. Ata pyetën: “Kush është Zyraja, do vijë me ne për një sqarim të vogël”. Kur na panë që po dridheshim, na qetësuan: “Mos kini merak; punë votash”.
25 vjeçarja nuk u thirr asnjëherë, nuk u pyet asnjëherë.
“Pranova të shkoja komisionere në zgjedhjet e 2017. Kurrë nuk jam marrë me parti. Kur nuk kam qenë anëtare partish. Hyra meqë isha e lagjes, në sytë e mi është votuar rregullisht”-, këmbëngul vajza. Por, SPAK e ka futur të renë në listën e keqbërësve zgjedhorë dhe për këtë arsye Zyhrasë pas vizitës në të gdhirë, pasi i sekuestruan telefonin e njoftuan se Gjykata e Posaçme ka shpallur detyrim paraqitje. Hetimi i SPAK tregon se komisionerët e dy qendrave në këtë fshat lejuan votimin e disa banorëve, të cilët ndërkohë ishin emigrantë. Numri i atyre që votuan pa qenë fare në fshatin e tyre është 30 persona thekson SPAK. Fshati Rubjek sipas të dhënave të KQZ ka në evidencë 680 zgjedhës, prej të cilëve shumica janë të rinj që kanë ndërtuar jetën në Itali.
“M’u shkatërrua jeta! SPAK nxorri emrin tim, të dhënat e mia, për diçka që jam e bindur që nuk e kam bërë kurrë. Kjo është tallje me jetë njerëzish”-, komenton Zyraja.
“Unë qenkam peshku i madh?”.
Në të njëjtën lagje, jeton edhe nje tjetër “keqbërëse zgjedhore”, Oriada. E papunë. E shkolluar si infermiere, u angazhua pak kohë në spitalin e Durrësit. Prej dy vitesh i hyri gjermanishtes, me vetëm një ëndërr. Të largohej, siç vepruan bashkëmoshatarët e saj. E ëma drejton gishtin nga qielli: “nuk lejoj askënd të mbyllë jeten e time bije, çfarë do qofshin ata! Dua drejtësi dhe të vijnë të na kërkojnë falje madje. Ishte fëmijë, kur e futën në komision, ku kanë qenë?”.
Gruaja bashkë me gjestet ngre zërin, sepse në gusht, Oriada parashikonte të largohej në emigracion.
“Kur mori dëshminë e penalitetit doli e pastër, së bashku me një tufë dokumenta që i paraqiti për të filluar punë në Gjermani”.
Por, planeve të 25 vjeçares ju vendos shkelmi. Edhe Oriada rezulton të ketë qenë komisionere në zgjedhjet e 2017. Edhe Oriada gjendet në të njëjtën varkë ku ishin edhe 13 bashkëfshatarët e Rubjekut.
Dy prej tyre kanë vdekur ndërkohë. Gjersa të mbyllen hetimet e të dalë e vërteta, të tjerëve u duhet uruar mbi të gjitha jetë të gjatë. Zgjedhje, punë votash dhe veçanërisht peshq do sjellë Gjiri i Lalëzit plot, mjafton të hedhin rrjetat!
Foto 1 Zyhra Lala .
Foto 2 Fshati Rubjek
Foto 3 Mamaja e Oriadës
