“Nuk ka deklaruar disa të dhëna që tashmë janë bërë publike”
Grupi Parlamentar i PS, do dërgojë në Prokurori një kërkesë për verifikimin e formularit të vetëdeklarimit të deputetit Flamur Noka. “Në formularin e vetëdeklarimit të deputetit Flamur Noka, të depozituar në KQZ me numër protokolli 489, datë 6.4.2016 nuk janë deklaruar në pikën 5 dhe në pikën 7 të dhëna të bëra publike dhe të njohura botërisht lidhur me ndalimin, vendosjen e masës së sigurisë personale dhe dëbimin nga një shtet i huaj”,thuhet në kërkesën e grupit parlamentar të PS. Në kërkesën drejtuar Prokurorit thuhet se në kuadër të ligjit për garantimin e integritetit të personave që zgjidhen, emërohen ose ushtrojnë funksione publike këta persona kanë detyrimin ligjor që në Formularin e vetëdeklarimit të pasqyrojnë të dhëna të vërteta të plota dhe të saakta. Pasqyrimi i të dhënave të pavërteta, të paplota dhe të pasakta në këtë formular sjell skualifikimin e menjëhershëm dhe në cdo kohë nga kandidimi, zgjedhja/emërimi apo ushtrimi i funksionit publik.
