Përplasjet në zyrat e ZRRE vazhdojnë, për ngritjen e çmimit të energjisë elektrike. Pas përpjekjes së aktivistëve të PSD për të hyrë brenda zyrave ka sjellë dhe reagimin e ashpër të policisë, madje disa prej aktivistëve janë vënë në pranga. Bëhet me dije se, kryetari i PSD-së, Dardan Molliqaj, zyrtarët Frashër Krasniqi, Nol Nushi dhe të tjerë, janë arrestuar nga Policia e Kosovës në ambientet e ZRRE-së.
PSD paraprakisht ka deklaruar se kushti për ta lëshuar hapësirën e Zyrës së Rregullatorit për Energji ishte publikimi i vendimin për shtrenjtimin e rrymës. Molliqaj i tha kryesuesit të bordit të ZRRE-së, Ymer Fejzullahut se s’mund t’i lënë të punojnë, pasi sipas tij, ata po mashtrojnë. Sipas Molliqajt, rryma është shtrenjtuar edhe për ata që shpenzojnë deri në 800 kwh në muaj.
Ndërkaq sipas policisë, rreth orës 15:00, në rrugën “Bekim Fehmiu” në Prishtinë, saktësisht në objektin e ZRRE-së, me urdhër të prokurorit të shtetit, janë arrestuar 13 persona. PK thotë se megjithëse policia vazhdimisht u ka bërë thirrje që të dalin nga objekti dhe të vazhdojnë aktivitetin e tyre, duke mos penguar zyrtarët e institucionit në fjalë, të njëjtit nuk janë bindur.
“Duke parë që kanë dështuar të gjitha përpjekjet tjera, në përputhje me autorizimet policore dhe urdhrin e prokurorit të shtetit, janë arrestuar 13 nga ta dhe aktualisht po vijon ndërmarrja e veprimeve në këtë fazë preliminare hetimore”, thuhet në njoftim. Pas përfundimit të procedurave të nevojshme policore, konform rekomandimit të prokurorit të shtetit për cilësimin e veprës për të cilën dyshohen, personat e arrestuar do të procedohen më tej.
Ndërkaq kryetari i Bordit të ZRRE-së, Ymer Fejzullahu, ka thënë se vendimi i ZRRE-së për ndryshimin e tarifave do të publikohet brenda 30 ditëve.
