Forcat e Policisë që ndodhen sot përballë protestës së opozitës do të asistohen nga ekspertë të misioneve të huaja pranë Policisë së Shtetit.
Mësohet se ekspertët e huaj kanë trajnuar policinë për menaxhimin dhe dokumentimin e protestës si dhe reagimin për çdo situatë. Policia ka vënë në aplikim teknologjinë e fundit, për fiksim, filmim dhe identifikim të personave në protestë.
Një orë para nisjes së protestës së paralajmëruar prej ditësh nga opozita, Avokati i Popullit, Igli Totozani, ka urdhëruar grupin e ekspertëve të Seksionit të Veçantë në institucion, që të monitorojnë nga afër protestën e opozitës, e paralajmëruar për ditën e sotme.
Ekspertët e Avokatit të Popullit do të qëndrojnë në të gjitha pikat hyrëse në kryeqytet, që nga sheshi “Shqiponja”, “Pallati me shigjeta”, si dhe në “Rrugën e Elbasanit”.
