Gjykatën Evropiane për të Drejtat e Njeriut, tjetër gjobë qeverisë.
“Rista kundër Shqipërisë”, çështja e radhës e shqyrtuar në Strasburg për pronat në Shqipëri, i sjell edhe një tjetër faturë të majme qeverisë shqiptare. Gjoba është plot 10.7 milion euro.
Gjykatën Evropiane për të Drejtat e Njeriut ka shqyrtuar gjithsej 7 çështje që kanë të bëjnë me pronarë të ndryshëm nga Shqipëria dhe ka dhënë vendimin përfundimtar sipas të cilit qeveria shqiptare duhet ta paguajë gjobën brenda tre muajve. Kjo është gjoba më e lartë e dhënë ndonjëherë nga kjo gjykatë për qeverinë shqiptare. Në nëntor 2015 Gjykata e Strasburgut kishte penalizuar shtetin shqiptar me 5 milionë euro, po për çështje pronash. Gjykata e Strasburgut konstaton se autoritetet shqiptare kanë dështuar gjatë shumë vitesh për të zbatuar vendimet e gjykatave në vend për të kompensuar pronarët, duke shkelur të drejtat e tyre. Pak kohë më parë drejtues të lartë të qeverisë, teksa mbronin ligjin e ri të pronave, thanë se e kanë zgjidhur çështjen me Strasburgun. Por ndërkohë që ligji është ankuar në Kushtetuese, faturat e gjobës së pronave ndaj qeverisë po dyfishohen.
