Avokati Genc Gjokutaj ka dalë në një konferencë për mediat sëbashku me Petrit Vasilin ku si përfaqësues i kryetarit të partisë së Lirisë, ka dhënë detaje mbi shkelje të ligjit të bëra sipas tij nga ana e Autoritetit të Dosjeve dhe prokurorisë. Ai tha se Ilir Meta nuk ishte thirrur në prokurori për të deklaruar sa i takon padisë së bërë ndaj Autoritetit të Dosjeve.
Nga ana tjetër, vendimin e Prokurorisë për të mos filluar hetimin për çështjen penale për kallëzimin e Metës ndaj Autoritetit të Dosjeve, Petrit Vasili e konsideron nul. Vasili renditi edhe shkeljet që sipas tij janë bërë nga ana e prokurorisë.
“Prokuroria e Tiranës ka vendosur mos fillimin e çështjes penale për kallëzimin e bërë nga Meta ndaj anëtarëve të Autoritetit të Dosjeve. Ky vendim shkel ligjin si në procedurë është edhe në përmbajtje. Së pari, veprimet e Prokurorisë kanë qenë skandaloze dhe të paimagjinueshme. Prokuroria nuk ka dëgjuar farë palën akuzuese, por vetëm të akuzuarve. Së dyti, Prokuroria duke mos regjistruar procedimin penal nuk i ka marrë dokumentet që tregonin qartë shpërdorimin e detyrës së autoriteteve të dosjeve. Së treti është fakt publik që vetë drejtuesja, Genta Sula ka pohuar se dy anëtarë të autoritetit kanë bërë verifikimet. Po kjo drejtuese, në dëshminë e dhënë në prokurori ka dëshmuar të kundërtën, duke thënë se nuk është kryer ndonjë verifikim. Pra dëshmi kontradiktore. Së katërti, është një shkelje shumë e rëndë penale, që pa bërë verifikim për identitetin e Metës, autoriteti ka caktuar emrin e Ilir Metës gjoja të lidhur me sigurimin e shtetit pa pasur asnjë dokument. Së pesti megjithëse ligji nuk e lejonte është bërë verifikimi me Metën dhe konkluzionet gjoja të nxjerra janë përcjellë nga autoriteti i dosjeve kuvendit një ditë pas themelimit të PL. Së gjashti është fakt që në shkelje të ligjit, përfaqësuesit ligjor të zotit Meta nuk i janë vënë në dispozicion as dokumentet nga autoriteti i Dosjeve. Ky vendim i prokurorisë është nul”, tha Vasili.
