Dyshohet se janë krijuar nga aktivitetit kriminal i “shfrytëzimit të prostitucionit” dhe “trafikut të lëndëve narkotike”
Prokuroria e Krimeve të Rënda kërkoi konfiskimin e pasurive të të pandehurit Dashamir Gjoka. Prokuroria kërkoi konfiskimin e 9 pasurive të paluajtshme, për të cilat dyshohet se janë krijuar në bazë të të ardhurave të krijuara nga i pandehuri nga aktivitetit kriminal i “shfrytëzimit të prostitucionit…” dhe “trafikut të lëndëve narkotike…” në Itali.
Dashamir Gjoka u arrestua pka ditë më parë i akuzuar për veprën penale të “Pastrimit të produkteve të veprës penale…”, ndërkohë që Prokuroria për Krime të Rënda kërkon konfiskimin e pasurive të tij, në bazë të ligjit “Antimafia”. Është fjala për komplekse tregtare, godina multifunksionale, tokë truall, tokë arë, si edhe një shoqëri tregtare, të gjithë të regjistruara në emër të shtetasit Dashamir Gjoka dhe familjarëve të tij.
Fillimisht, ndaj këtyre pasurive, Prokuroria për Krime të Rënda ka vendosur sekuestro preventive, me leje të Gjykatës për Krime të Rënda, në kuadër të hetimit pasuror që ishte filluar ndaj të pandehurit Dashamir Gjoka.
