Paisja e fshehtë përgjuese u denoncua në media
Prokuroria e Përgjithshme ka nisur hetimet për ekzistencën e një paisje përgjimi të paautorizuar në policinë e shtetit. Burime nga organi i akuzës bëjnë me dije se proçedimi për çështjen ka nisur para dy ditësh. “ Një paisje përgjuese tepër e sofistikuar është instaluar prej më shumë se një muaji në zyrat e Drejtorisë së Përgjithshme të Policisë, duke vënë në alarm institucionet e sigurisë. Pajisja nuk rezulton e regjistruar në asnjë regjistër zyrtar apo dokument tjetër të institucioneve të Sigurisë. Jo zyrtarisht policia thotë se kjo paisje përdoret për qëllime trajnimi të policisë së Shtetit. Historia ka nisur rreth 1 muaj më parë kur institucionet e inteligjencës shqiptare kanë rënë në dijeni të një informacioni se policia shqiptare po përdor një pajisje përgjimi të paregjistruar dhe të papautorizuar nga Prokurori i Përgjithshëm. Sipas burimeve, paisja që shërben për zbulimin e personave në kërkim i është dhënë policisë shiptare nga homologët italianë”-thuhej në një artikull të gazetës “MAPO” me titull; “Kë po përgjon Policia e Shtetit”?
