Prokuroria e Tiranës, Durrësit dhe e Krujës kanë nisur zyrtarisht tre hetime për sa i përket dëmeve të shkaktuara nga tërmeti i mëngjesit të 26 nëntorit.
Hetimi i parë nga Prokuroritë po kryhet për godinat e shembura që nën rrënojat e tyre zunë poshtë njerëz ku shumë prej tyre nuk mundën të dalin të gjallë.
Hetimi i dytë po kryhet për dëmtimin e rëndë të godinave që janë dëmtuar në qytetin e Durrësit por edhe në Thumanë, për të cilat do të hetohet e gjitha puna se si janë ndërtuar dhe personat përgjegjës.
Ndërsa hetimi i tretë po kryhet për godinat e dëmtuara në kryeqytet.
Prokuroria në terren, tek godinat e rrënuara në Durrës, Thumanë e në Tiranë ka marrë edhe mostrat e ndërtimit të godinave, siç janë fijet e hekurit, copat e betonit, rëra etj.
Këto mostra do të analizohen në laboratorët përkatës ku do të përcaktohet edhe nëse kanë qenë të rregullta dhe në masën e duhur për të mbajtur peshën e ndërtimeve të kryera.
Në vijim të veprimeve të kryera, po kërkohet informacion Bashkisë së Tiranes e të Durrësit por edhe të Krujës për banesat e evidentuara tashmë si të prekura nga tërmeti dhe të klasifikuara jo në kushtet e duhura për banim. I njëjti informacion i është kërkuar dhe strukturave të tjera shtetërore.
