Kryetari i Partisë Republikane, Fatmir Mediu, ka mbështetur qytetarët e Himarës që kanë paralajmëruar protestë për kthimin e pronave të tyre në bregdet, ditën e djelë.
Sipas banorëve qeveria parashikon rrafshimin dhe grabitjen e pronave nga Spilleja në Potam, me qëllim zbatimin e projektit të saj për këtë zonë. Ata do të do të mblidhen në zonën e Spillesë për të protestuar.
Mediu i ka kërkuar qeverisë të bëjë regjistrimin dhe hipotekimin e pronave tek pronarët e ligjshëm.
Fatmir Mediu
Të ndalet çdo projekt shkatërrues në emër të interesit publik korruptiv që cënon pronën legjitime dhe i shërben vetëm interesave korruptive të pushtetit. Çdo plan zhvillimi ka nevojë për gjykimin dhe mbështetjen e komunitetit. As Kryeministri dhe askush tjetër nuk ka të drejtë të sillet si pronar me pronat e bregdetasve. Kjo perlë e natyrës shqiptare me potenciale të jashtëzakonshme për zhvillimin e turizmit do të zhvillohet vetëm atëherë kur prona të shkoj tek i zoti, por njëkohësisht, duke ruajtur vlerat historike. Betonizimi dhe babëzia kanë shkatërruar ato pak vlera historike që i kanë ngelur vendit tonë dhe kjo është fatkeqësi kombëtare.
