Transparenca e Ministrisë së Financave: Ja sa interes ka për kompaninë e sigurimeve
Privatizimi i kompanisë shtetërore të sigurimeve duket se është pritur me interes nga blerësit pretendëntë të saj. Ministria e Finacave njoftoi se deri më tani janë shtatë subjekte që kanë blerë dokumentacionin pranë kësaj ministrie, duke u bërë kështu pjesë e garës që hapet në mars. Në njoftimin e dalë nga financat thuhet: “Ministria e Financave, në kuadër të transparencës me publikun lidhur me procedurat e parashikuara, bën me dije se, deri në datën 15 Shkurt 2016, kanë shprehur interes dhe kanë tërhequr dokumentacionin e tenderit shtatë subjekte. Koha për tërheqjen e dokumentacionit dhe përgatitjen e dorëzimit të ofertave për pjesëmarrjen në tender është deri më datë 10.03.2016.”
Gara e radhës për privatizimin e INSIG, një process i dështuar disa herë u hap me 25 janar 2016. Në shitje janë 100 për qind të kompanisë për një vlerë që nis nga shuma 15,305,000 (pesëmbëdhjetë milion e treqind e pesëmijë) euro.
