Komisioni i Organizimit dhe Kontrollit të Operacioneve Elektorale në PD kanë prezantuar në një konferencë për mediat detajet nga zhvillimi i primareve për zgjedhjen e kandidaturave për zgjedhjet e ardhshme lokale 2023.
Anëtari Kryesisë së PD, Enno Bozdo, njëkohësisht dhe anëtar i këtij komisioni bëri publike dy risitë e reja në këto primare, që sipas tij janë vendosja e balotazhit për të përcaktuar fituesin dhe një debat mes kandidatëve të primares.
“KOKO do të shpallë hapjen e procesit zgjedhor kur të dalë data e mbajtjes së primareve. KOKO do të menaxhojë këtë proces. Sot kemi dy operacione për të cilat ne jemi përgjegjëse, i pari ka të bëjë me regjistrimin e kandidatëve për primaret, kanë ndodhur deklarime dhe i dyti ka të bëjë me fillimin e procesit. Këto po zhvillohen. Data për të bërë përzgjedhjen e kandidatëve do të jetë nga data 6-13 nëntor. E para është vendosja e balotazhit për të përcaktuar fituesin. E dyta është një debat mes kandidatëve të primares. Janë dy risi që parashikohen në këto rregullore”, tha Bozdo.
Mësohet se, afati i dorëzimit të kandidaturave për Durrës, Tiranë dhe Elbasan është data 6 nëntor ora 20:00, dhe për bashkitë e tjera është 8 nëntor ora 20:00. Pas këtij afati, nuk pranohet asnjë kandidaturë.
