Qytetarët tashmë mund të kryejnë shërbimet online në telefonin e tyre si për shembull të kontrollojë konsumin dhe faturën mujore, apo të kryejë pagesa të faturave pa komision pa patur nevojë të shkojnë në zyrat e Kujdesit ndaj Klientit, nëpërmjet aplikacionit OSHEE Mobile.
Ministri i Energjisë dhe Industrisë Damian Gjiknuri dhe administratori i OSHEE-së, Adrian Çela kanë ndjekur nga afër prezantimin e aplikacionit.
Me anë të aplikacionit OSHEE Mobile çdo përdorues i një telefoni “smart” mundet të regjistrohet për të patur llogarinë online pranë kompanisë; të kontrollojë konsumin dhe faturën mujore; të kryejë pagesa të faturave pa komision; të kryejë një kërkesë apo ankesë si dhe të ndjekë statusin e saj; të aksesojë portalin e punësimit dhe aplikojë për një vend pune pranë kompanisë.
Gjithashtu krijohet mundësia që të denoncohet çdo abuzim me të cilin ndeshet qytetari duke e shoqëruar me fotografi dhe të dhëna konkrete. Qytetarët mund të shikojnë në hartë dhe informohen edhe mbi Qendrat e Kujdesit ndaj Klientit apo aktivitetet e produktet e Operatorit të Shpërndarjes.
Për Ministrin Gjiknuri këto investime janë shumë të rëndësishme pasi në qendër të tyre është klienti. Qytetarët e kanë mirëpritur investimin në teknologji dhe gjithnjë e më shumë po përdorin format alternative të pagesave dhe informimit”, u shpreh Gjiknuri.
Duke ju referuar OSHEE Mobile, ai theksoi se “Aplikacioni është mundësi e mirë për të gjurmuar ankesa, për të kryer denoncimin në kohë reale duke dhënë mundësinë e ndjekjes së saj, ndëshkimin e personave përgjegjës dhe zgjidhjen e problemit. Përmes denoncimeve do ti jepet mundësia kompanisë të korrigjojë edhe performancën e saj”.
