Drejtoresha e gjimnazit të Tetovës në Maqedoninë e Veriut, Teuta Llalla ka denoncuar në polici një rast të presionit politik që i është bërë. Sipas raportit të policisë, drejtoresha ka bërë kallëzimin ditën e sotme në drejtorinë e policisë së Tetovës, ku është shprehur se i është kërkuar që të japë dorëheqjen.
Më 18-mars të këtij viti rreth orës 15.00, dy persona nga Tetova me inicialet, S.S. 44 vjeç dhe V.A. 33 vjeç, e kanë thirrur që të vijë në një lokal të Komunës së Tetovës dhe pasi ka hyrë në njërën nga zyrat i kanë thënë, i kanë kërkuar pa asnjë shpjegim që me shkrim të japë dorëheqje nga pozicioni i drejtoreshës në shkollën e mesme të Tetovës, jo më vonë se deri më 21 mars 2022.
Gjithashtu sipas policisë, personat në fjalë i kanë thënë se janë autorizuar nga kryetari i komunës dhe se në emër të tij kërkojnë dorëheqjen e Teuta Llallës.
Llalla është shprehur se që nga data 9 mars të vitit të kaluar, kur me vendim është zgjedhur në detyrën e drejtoreshës, nuk kishte marrë asnjë njoftim për ndonjë lëshim apo gabim në punën e saj. Policia bën të ditur se po merren masa për zbardhjen e rastit dhe do të vijojë parashtresë përkatëse.
