Në fjalimin e tij të parë para Asamblesë së Përgjithshme të Kombeve të Bashkuara, Presidenti i SHBA, Donald Trump foli për një shkatërrim të plotë të Koresë së Veriut nëse regjimi komunist i Kim Jong Unit kërcënon Shtetet e Bashkuara.
Trump foli edhe për terrorizmin, programin bërthamor iranian dhe sfida të tjera, si dhe rolin e OKB në përgjigje të këtyre sfidave.
Duke folur për Korenë e Veriut, Presidenti tha se Shtetet e Bashkuara kanë fuqi dhe durim të pamasë, por se do të veprojnë nëse nuk kanë rrugëdalje tjetër. Ai i dërgoi një paralajmërim të fortë regjimit koreanoverior.
“Shtetet e Bashkuara kanë aftësinë për ta shkatërruar plotësisht Korenë e Veriut, nëse nuk ka rrugëdalje tjetër për të mbrojtur veten dhe aleatët. Ka ardhur koha që Koreja e Veriut të kuptojë se çarmatimi bërthamor është e vetmja rrugë drejt së ardhmes”, – tha Trump.
