Caleb Ekuban do të qëndrojë tek Partizani të paktën deri në qershor të vitit 2018. Presidenti i klubit të kuq Gazmend Demi konfirmon në një intervistë për “Ora News” se është arritur marrëveshja mes kryeqytetasve dhe Chievos që zotëron të drejtat e lojtarit për ta zgjatur qëndrimin e sulmuesit ganezo-italian edhe për një sezon tjetër.
Kujtojmë që akordi aktual mbyllet në muajin qershor.
Në këtë mënyrë shuhen të gjitha spekulimet për një rikthim të 22 vjeçarit në Itali dhe tashmë “demat” do të kenë në gjirin e tyre një lojtar me cilësi absolute jo vetëm për këtë sezon, por edhe për edicionin e ardhshëm.
Ekuban u afrua tek të kuqtë në fillim të këtij sezoni dhe pas një starti jo të përsosur dhe periudhës logjike të ambjentimit u shndërrua në sulmuesin kryesor të Partizanit.
Aktualisht ai është një pikë referimi për trajnerin Sulejman Starova në repartin e avancur të 15 herë kampionëve të Shqipërisë.
/ora news/
