Presidenti Ilir Meta ka zhvilluar sot një vizitë në Bashkinë e Pustecit, ku u takua me komunitetin maqedonas. Gjatë kësaj vizite, Meta ja ka marrë edhe valles.
“Në kuadrin e Vitit të rëndësishëm mbarëkombëtar të Gjergj Kastriot Skënderbeut, është rënë dakord me përfaqësuesit e Bashkisë së Pustecit, të vlerësojmë disa nga ngjarjet më të rëndësishme historike të kësaj zone dhe personalitetet me peshë, të cilët kanë dhënë kontribut të jashtëzakonshëm jo vetëm për këtë zonë, por për të gjithë Shqipërinë”, tha Meta.
Në këtë kuadër, Presidenti Meta tha se do të vlerësohet Sterjo Spasse, biri i komunitetit maqedonas, i cili ka kontribuuar në mënyrë të veçantë, jo vetëm për historinë e njohur të kësaj treve”.
“Në mënyrë të veçantë edhe vepra e tij ‘Pse?’ mbetet aktuale dhe një apel për dilemat që shtrohen për zgjidhje në shoqërinë tonë, veçanërisht për të rinjtë të cilët nuk duhet të largohen nga vendi, por duhet të ndërtojnë të ardhmen e tyre këtu. Çdo vit do të kujtohen ngjarjet kulturore rajonale në promovim të figurave historike, por edhe të vlerave të veçanta që ka ky rajon për të motivuar talentet e reja dhe veçanërisht të rinjtë”, – theksoi Presidenti Meta.
