Parku i lojërave që po ndërtohet tek Liqeni Artificial ka përfshirë në debat Presidetin e Republikës, Bujar Nishani dhe kryetarin e bashkisë më të madhe në vend, Tiranës, Erjon Veliajn.
Presidenti Nishani në një status sot në Facebook e cilësoi vandalizim parkun e lojrave tek liqeni. “Vandalizmin nuk e fsheh asnjë bojatisje”, shkruan Presidenti, duke postuar edhe disa foto nga punimet.
Ai edhe më parë kishte reaguar për këtë ndërtim duke u vënë në krahun e aktivistëve të shoqërisë civile që e kundërshtuan fort këtë vendim të Bashkisë.
Nga ana tjetër kryebashkiaku nuk është kursyer në komente ndaj kreut të republikës.
Duke premtuar që parku do të jetë më 1 qershor, Veliaj e cilësoi kërkesën e Nishanit butaforike.
“Parku do të jetë gati në 1 qershor, po punojmë me 3 turne. Parku do të mirëmbahet nga agjencia e rekreacionit. Më dhimbset presidenti që reagon për kënd lojërash dhe nuk reagon njëlloj për çështje të rëndësishme. Kërkesa për hetim ndërkombëtar është butaforike dhe vjen në përfundim të detyrës”.
