Në një letër dërguar Presidentit të Këshillit Europian, presidenti i Sllovenisë, Borut Pahor, i ka kërkuar Bashkimit Europian që në samitin e 23 qershorit të heqi regjimin e vizave për qytetarët e Kosovës.
Kërkesën Presidenti slloven e ka bërë përmes një letre dërguar Presidentit të Këshillit Europian, Charles Michel, ndërsa dorëzimin e saj e konfirmoi sot në fjalimin e tij në Forumin e Prespës.
Pahor tha se i kërkoi BE-së që të merr vendime për përshpejtimin e integrimit të gjashtë shteteve të Ballkanit Perëndimor.
“Unë besoj se nevojiten hapa konkretë për të përshpejtuar zgjerimin e Bashkimit Europian në Ballkanin Perëndimor. Shqipërisë dhe Maqedonisë së Veriut t’i jepet drita jeshile për fillimin e negociatave në qershor dhe Kosova të marrë liberalizim vizash. Besoj se të dyja kërkojnë vetëm vullnetin politik të shteteve anëtare, si të tre shtetet plotësojnë të gjitha kushtet për të thënë. Dua gjithashtu një proces më të shpejtë negociues me Malin e Zi dhe Serbinë”, ka shkruar Pahor, raportojnë mediat në Sarajevë.
Ai ka shprehur shqetësim të veçantë për situatën në Bosnje e Hercegovinë.
“Jam i bindur se është e domosdoshme që Bosnjes e Hercegovinës t’i jepet statusi i kandidatit pa kushte. Natyrisht, duhet të plotësojë kushtet, por rendi duhet të jetë i ndryshëm – kështu që së pari statusin e kandidatit dhe më pas plotësimin e kushteve. Sipas mendimit tim, kjo do t’i forconte forcat pro-evropiane në Bosnjë e Hercegovinë dhe dinamikat e përshtatjes së brendshme me normat evropiane”, ka shkruar Pahor.
