Pas përjashtimit dhe dëbimit nga Partia Socilalise në vitin 2016, Kryeministri Edi Rama dhe biznesmeni Koço Kokëdhima po rigjejnë miqësinë e tyre. Rikthimi tek miqësia e vjetër vjen pas gjashtë nga vitesh ndarja më epike e politikës shqiptare gjatë tre dekadave të fundit. Dhe kur bëhet fjalë për miqësi mes një kryeministri dhe një biznesmeni, mendja detyrimisht të çon tek ndonjë tender i bërë së fundmi. Dhe pikërisht është Posta Shqiptare, e cila i ka dhënë ditët e fundit Koço Kokëdhimës një tender me vlerë rreth 500 mijë euro për shërbim interneti.
Në këtë tender është shpallur fituese kompania “Abissnet”, e cila është në pronësi të Koço Kokëdhimës. “Abissnet” posedohet 100% nga kompania “2 K Group”, e cila kontrollohet nga familjarët e Koços.
Ky tender është mesazhi i qartë i afrimit mes Ramës dhe Koços, pas ndarjes së bujshme në 2016, ku Rama përzuri Kokëdhimën nga çdo funksion të Partisë Socialiste, ndërsa Kokëdhima artikuloi akuza të forta ndaj Ramës, deri tek pretendimi se Rama është i çmendur.
Miqësia e tyre ishte aq e ngushtë sa, më mjë takim në Vlorë, Rama do të deklaronte idenë për të kaluar pleqërinë me Kokëdhimën në Vuno, ndërsa Koço konsiderohej si kryeministri në hije, pashai i jugut. Fjalë të cilat ngelën në erë, pasi vetëm pak muaj më vonë Rama e lëshoi Koçon pas protagonizmit të tij në rritje në jug të vendit, ku krijoi edhe struktura paralele.
Goditjen e fundit Koço e mori kur protagonizmin e tij në jug, donte ta përkthente edhe në një projekt për reformimin e PS-së. Por Rama si një mjeshtër i djegies së figurave në politikë, e dëboi nga çdo funksion të partisë por edhe në biznes. Kësisojë Koço u bë një nga armiqtë e Ramës duke u pozicionuar fort në krah të Metës. Ky i fundit njihet për një afeksion misterioz ndaj Koços, deri në atë shkallë saqë e ka kopjuar edhe emrat e fëmijëve të Koços.
Por siç thuhet në llogoret politikës dhe biznesit, kur bëhet fjalë për të ndarë ca lekë nga taksat e qytetarëve, armiqësia mes këtyre dyjave është afatshkurtër. Dhe këtë na e vërtetuan kësaj radhe miqtë që u bënë armiq e tani prapë miq, Rama dhe Kokëdhima.
