Politikania dhe sociologia e njohur nga Beogradi, Vesna Peshiç thotë se vendosja e kufijve të rinj në Ballkan do të shkaktonte vuajtje të mëdha, shkatërrim dhe jostabilitet.
“Unë jo vetëm që e hedh poshtë, por ndjej neveri ndaj idesë së ‘vendosjes së kufijve etnikë’. Përherë e kam hedhur poshtë konceptin radikal (sheshelian, v.j.) dhe millosheviqian të ‘shtetit etnik’, përkatësisht njëfarë pronësie etnike mbi territoret si dhe luftërat e tyre të përgjakshme dhe kriminale që zhvilluan për të zaptuar dhe bashkuar ‘tokat etnike serbe'”, deklaroi Vesna Peshiç në një intervistë me revistën “Vreme” të Beogradit.
Sipas saj, praktika e vendosjes së kufijve etnikë është dëshmuar si e dhunshme dhe kriminale, madje është një koncept millosheviçjan.
“Rikufizimi etniko-territorial, u ka shkaktuar vuajtje të mëdha të njerëzve, shkatërrim dhe jostabilitet të Serbisë dhe vendeve fqinje që u themeluan në truallin e ish-Jugosllavisë. Pa shihni tani sërish duan të njëjtën: ta copëtojnë Kosovën dhe Serbinë në pjesëza etnike të tokës, t’i shkëmbejnë toka si në Pazar dhe të shpërngulin njerëz. Kjo është absolutisht e papranueshme”, tha ajo.
