Policia italiane ka goditur një bandë italo-shqiptare e cila furnizonte me drogë grupet e tjera kriminale. Në pranga kanë rënë 20 shqiptarë dhe italianë, ku 15 kanë përfunduar në burg dhe 5 të tjerë në arrest shtëpie. Sipas mediave italiane, ata akuzohen për krijim të grupit të strukturuar kriminal me qëllim trafikimin dhe tregtimin e drogës dhe armëmbajtje pa leje.
Duke ndjekur një kanal të mundshëm furnizimi me drogë në sheshin e tregut Pioltello, në zonën e Milanos, Policia gjeti një sërë personash me origjinë shqiptare, banues në disa bashki të zonës së Bergamos së Poshtme. Kështu, hetimi u përqendrua në një organizatë kriminale, me origjinë shqiptare dhe italiane, aktive midis Bresciano-s, Bergamos së Poshtme dhe disa zonave të rrethinës së Milanos , e cila, për t’u vendosur në disa sheshe të trafikut të drogës, kryente akte të bazuara në dhunë, ndonjëherë edhe me përdorimin e armëve. Sipas rindërtimit të hetuesve, organizata kriminale do të kishte mundur të furnizonte kryesisht heroinë dhe kokainë për grupe të tjera kriminale që vepronin në Italinë qendrore dhe veriore.
Policia ka sekuestruar 1.4 kg kokainë, afërsisht 14 kg heroinë, 100 kg lëndë prerëse, rreth 17.500 euro cash dhe dy pistoleta gjysmë automatike. Nga kontrollet e shumta u sekuestruan rreth 74 mijë euro cash dhe u arrestua një person për mbajtjen e 700 g. të kokainës. Aktiviteti u krye me ndihmën e agjentëve të Skuadrave Lëvizëse të Bergamos, Brescia, Bolzano, Novara, Rimini, Shtabi i Policisë Varese dhe Departamenti i Parandalimit të Krimit të Lombardisë.
