Ndërkohë që autoritetet në varësi të qeverisë shqiptare marrin çdo masë ndëshkimore për penalizimin e qytetetarëve që shkelin rregullat e përcaktuara në Aktin Normativ për pengimin e përhapjes së koronavirusit, fotot e mëposhtme nga një takim i Policisë së Shtetit në një ambjent të mbyllur dhe afërsia mes të pranishmëve është shqetësuese.
Mbledhja për të cilën po flasim është zhvilluar në Tropojë, ndërsa kanë marrë pjesë kryepleqtë e fshatrave, Prefekti i Qarkut Kukës Zenel Kuçana, Drejtori i Policisë së Qarkut Kukës dhe shefi i komisariatit të Policisë së Tropojës.
Në fotot e mëposhtme vihet re qartë mungesa e distancës së autorizuar, mospajisja me maska dhe doreza, një sallë e mbushur pothuajse plot, kjo mbledhje u zhvillua pa asnjë shqetësim, ndërkohë që asnjë polic nuk vajti me bllokun e gjobanve në dorë për të ndëshkuar shefat e policisë, të cilët japin këshilla për të tjerët.
