Një aksident ka ndodhur ditën e djeshme në qytetin e Pogradecit, ku një punonjës i policisë, duke drejtuar automjetin e tij, ka aksidentuar një 13-vjeçar me inicialet O.S. Për fat të mirë i mituri ka pësuar lëndime të lehta, ku pas mjekimit në spitalin e Korçës, është larguar në banesën e tij.
Pas mbërritjes së policisë në momentet e para të aksidentit, si drejtues i mjetit është paraqitur vëllai i policit me inicialet M. A., por nga këqyrja e pamjeve filmike është provuar se në timon ka qenë drejtuesi i mjetit, punonjësi i policisë me inicialet A.A.
Pas veprimeve hetimore, po hetohet në gjendje të lirë vëllai i policit me inicialet M. A., me akuzat “Deklarata e rremë para oficerit të policisë gjyqësore” dhe “Veprime që pengojnë zbulimin e së vërtetës”.
Ndërsa Drejtoria Rajonale e Agjencisë së Mbikëqyrjes Policore Korçë (ish-SHÇBA) ka shpallur në kërkim punonjësin e policisë A. A.
