Këngëtarja e njohur, Ronela Hajati në një intervistë para se të merrte pjesë në Eurovizion u shpreh se nuk e pretendonte fitoren por famën përtej kufijve nuk e diskutonte. Megjithatë, duket se artistja është në rrugën e duhur. Ndonëse nuk u kualifikua për në finalen e madhe, Ronela bëri bujë me këngën e titulluar “Sekret” brenda dhe përtej kufijve. Performanca në gjysmëfinale është një ndër më të klikuarat në rrjete sociale.
Pavarësisht faktit se kënga është pëlqyer jashtëzakonisht shumë nga publiku i huaj, Ronela nuk kaloi në finale. Kjo shkaktoi një revoltë dhe shumë njerëz, të famshëm ose jo, u ndanë në dy grupe: disa e mbështetën për atë që dha në skenën e festivalit evropian dhe të tjerë e cilësuan si tepër vulgare.
Sidoqoftë, Ronela po e shfrytëzon vëmendjen që ka marrë nga Eurovision. Një ditë më parë, këngëtarja publikoi një foto nga një studio muzikore. Bashkë me të ishin dhe përfaqësuesit e Austrisë, LumiX dhe Australisë, Sheldon Riley. “Koha e studios”, shkroi Ronela krahas fotos.
Ndërkohë, sot ka shkruar: “Nuk mund të them akoma asgjë por gjëra të mira po vijnë.” Nuk dihet nëse bëhet fjalë për një bashkëpunim mes tyre por duke marrë shkas nga këto postime që ka bërë së fundmi, hedh dyshime. Megjithatë, duhet të presim për një konfirmim zyrtar.
