Ende nuk janë identifikuar personat që qëlluan me armë zjarri pistoletë ndaj dy efektivëve të policisë Nako Mehmetaj dhe Anxhelo Breshani. Dy oficerët e policisë të cilët nuk ishin në krye të detyrës kanë qenë duke u kthyer nga palestra ndërsa ecnin me makinën e tyre tip “Audi” janë qëlluar nga një person që ju është afruar me një makinë “Volkswagen”. Sipas atyre që kanë deklaruar policët në komisariat thuhet se shkak është bërë konflikti për një parakalim të gabuar.
Gjithsesi, policia po vazhdon me pistat e saj, ndërsa qëndron më shumë tek fakti se kjo ngjarje ka qenë një mesazh për efektivët, por nuk ka qenë si qëllim vrasjen e tyre. Gjithsesi, ngjarje ka nevojë për një hetim më të thellë, duke patur parasysh se disa nga punonjësit e policisë në Shqipëri jo pak herë janë bërë palë me grupet kriminale.
Ndërkohë, vihet në pikëpyetje fakti që dy oficerët e policisë kanë mundur të identifikojnë tipin e makinës me të cilët lëvizte autori dhe jo targën. Ndryshe nga qytetarët e thjeshtë të cilët në momente të tilla edhe mund t’i kapë paniku, punonjësit e policisë janë trajnuar që në raste të tilla të identifikojnë sa më shumë detaje. Tashmë ju mbetet në dorë të autoriteteve për të hetuar më shumë mbi ngjarjen, ndërsa efektivët kanë mohuar që të kenë konflikte dhe nuk kanë dhënë ndonjë informacione se ku mund të kenë dyshime.
