Deputeti i Partisë Demokratike Luçiano Boçi në një intervistë për mediat, foli rreth procesit të zgjedhjes së presidenti. Ai tha se Rama nuk ka lënë institucion pa kapur, ndërsa presidentin “do t’ia jap” opozitës që të shpëtojë faqen e vet. Sipas tij, një njeri që pretendon se drejton me mençuri një vend di të ruajë dhe balancën politike.
“Duhet ta japë sepse me arrogancën e tij, a ka lënë ndonjë institucion pa kapur. I ka ngelur vetëm presidenca. Rama do të shpëtojë faqen e vet. Nuk është se pres unë, nuk është se kam ndonjë horizont pritës për Ramën që ka vepruar kështu. Unë po them të zbatojë kushtetutën dhe frymën e kushtetutës. Për të krijuar një klimë politike me një krizë ekonomike, sociale, një gjendje jo stabël të të gjitha elementëve të jetës. Një njeri që pretendon se drejton me mençuri një vend di të ruajë dhe balancën politike, të krijojë atë klimën që ja presidenti është ai i cili zgjidhet nga opozita” – tha Boçi.
Boçi gjithashtu tha se Rama po luan teatër tallës sepse po e luan me Alibeajn.
“Ai po e luan këtë teatër tallës sepse po e luan me Alibeajn. Jo se e ka seriozisht se në fund fare dihen kombinacionet. Sot në qoftë se ka një dështim të seancës për zgjedhjen e presidentit le ta mbajë Rama në kurriz sepse ai i ka votat, ai bëri proces, ai ka zgjedh emrat. Sot le të dilte me emra” – u shpreh Boçi.
