24 vite burgim ka kërkuar Prokuroria e Matit për Ermir Skejën, i akuzuar për “vrasje në rrethana cilësuese”, mbetur në tentativë ndaj dy personave, ngjarje e ndodhur në 28.05.2015 në zonën e quajtur “Baz”.
Libjond Permaku, efektiv i Shërbimit të Çështjeve të Brendshme dhe Ankesave është përfshirë në një konflikt me të pandehurin Skeja për shkak se ky i fundit i ngacmonte bashkëjetuesen.
Fillimisht efektivi Permaku u ka kërkuar familjarëve të Skejës, që ta bindnin të afërmin e tyre që mos ta shqetësonte bashkëjetuesen e tij por këto tentativa nuk ka rezultuar efikase.
Më pas më 28.05.2015 ndërmjet Permakut dhe Skejës ka nisur një konflikt fizik. Nga goditjet, ka mbetur i dëmtuar Skeja, i cili ka reaguar duke qëlluar me një pistoletë, të cilën e mbante pa leje. Në vendngjarje ka shkuar edhe Vilson Totraku, ndaj të cilit është qëlluar sërish me pistoletë nga i pandehuri Skeja.
Dy të plagosurit, në bazë të aktit të ekspertimit, rezulton se kanë marrë plagë, të cilat kanë qenë të rrezikshme për jetën në momentin e goditjes.
Pas plagosjes, autori Ermir Skeja është larguar menjëherë nga vendi i ngjarjes dhe nuk është bërë i mundur arrestimi i tij.
Ndërkohë, dy të plagosurit janë marrë me një makinë të rastit, drejtuar nga një kirurg, i cili i ka dërguar me urgjencë në spitalin e qytetit. Për shkak të gjendjes së rëndë shëndetësore, dy të plagosurit u dërguan me urgjencë në Spitalin e Traumës në Tiranë, ku iu nënshtruan ndërhyrjeve, të cilat u shpëtuan jetën.
