Gjykata e Apelit ka nisur shqyrtimin e masës së pezullimit për Haki Çakon nga detyra si Drejtor i Përgjithshëm i Policisë së Shtetit.
Vetë Çako nuk ishte i pranishëm në seancën me dyer të mbyllura, por përfaqësohet nga avokati Maks Haxhia.
Masa po shqyrtohet nga një trupë gjykuese e kryesuar nga Marie Qirjazi.
Çako ka ankimuar pezullimin nga detyra në Gjykatën e Apelit me 8 qershor.
Prokuroria ka zbardhur përgjegjësitë e drejtorit të Përgjithshëm të Policisë, Haki Çako në lidhje me futjen e pajisjes së përgjimit nga Italia.
Burime nga organi i hetimit thanë se Çako është shprehur se nuk ka asnjë dijeni për regjimin doganor të hyrjes së pajisjes, e cila ka ardhur nga Italia.
Në dëshminë e tij përpara Prokurorisë më datë 17 maj, Çako ka deklaruar se pajisja është në gjendje të identifikojë numrin IMEI të çdo aparati telefonik.
Gjithashtu, ai deklaron përpara organit të hetimit se Policia e Shtetit Shqiptar dhe partnerët e saj nuk ofrojnë trajnime në kundërshtim me Legjislacionin Shqiptar.
“Në këtë deklarim, me gjithë se kishin kaluar tetë ditë nga shkresa e tij e parë për sqarimin e situatës, ai shprehet se nuk ka asnjë dijeni për regjimin doganor të hyrjes së pajisjes”, thanë burimet nga Prokuroria.
Sipas Prokurorisë, Haki Çako pretendon në formë konseguente se aparatura nuk është përdorur në asnjë moment nga shtetas shqiptar, “por nga këqyrja e librit të hyrje daljeve në F.P.O. dhe nga pyetja e specialistëve të mbajtjes së librit rezulton se të paktën në dy raste automjeti ka qenë në posedim të shtetasit shqiptar Entiol Xhelilaj i vetëm. Pra shtetasi Haki Çako tregon se ka një inkoherencë të plotë me realitetin”.
