Për përplasjen në zyrat e Frymës së Re Demokratike, Sali Berisha i jep të drejtë Presidenti Ilir Meta. Ish-kryeministri Berisha u shpreh se Presidenti Ilir Meta tregoi se në çfarë mënyrë banditeske ka vepruar Rama dhe Veliaj për zyrat e FRD.
Në një lidhje direkte në emisionin “Milori Live”, në Klan News, Berisha tha se Presidenti ka vepruar në përputhje me ligjin, pasi po dhunohej Kushtetuta.
“Mendoj se në një vend ku ligji dhe shteti ligjor janë zëvendësuar me rregullin e mafies dhe të krimit, Presidenti nuk kishte alternative tjetër për tu dëshmuar shqiptarëve se në një mënyrë banditeske po dhunohej kushtetuta, po dhunohej pluralizmi duke shkelur çdo lloj rregulli të një shteti. Presidenti nuk shkoi aty për një betejë fizike, por shkoi për t’u thënë shqiptarëve çfarë degradimi ka pësuar Rama dhe Veliaj. Të dërgosh bandën pa vulë pa firmë dhe pa asgjë do të thotë që ti je kryetari i saj. Reagim i Presidentit ishte në përputhje me ligjet”, -u shpreh Berisha.
