Teuta besoi dhe vuri në jetë një përmbysje të madhe. Kampionët durrsakë arritën të rikuperojnë humbjen 0-2 të pësuar në Durrës duke marrë një fitore të madhe 0-3 në transfertë ndaj Inter Escaldes.
Ekipi i Edi Martinit vë në jetë një mrekulli të vogël, por historike për bregdetarët, të cilët prekin për herë të parë fazën e tretë të një turneu madhor si Conference League.
Kampionët kishin kontrollin total të ndeshjes dhe kaluan në avantazh në minutën e 25-të me Sebino Plakun.
Sulmuesi 36-vjeçar u kthye në protagonistin absolut, teksa në momentin më të vështirë të sfidës në minutën e 80-të realizoi një super gol duke mbajtur Teutën në lojë.
Për ironi të fatit, Plaku kishte në këmbë edhe golin e fitores së madhe, por në sekondat e fundi gaboi nga shumë pranë.
Teuta mbajti të njëjtin ritëm edhe në shtesë, ku në fundin e shtesës së parë Gruda fitoi një 11-metërsh pas një faulli të pësuar nga portieri.
Nga pika e bardhë e penalltisë, Sherif Kallaku u tregua i saktë duke i dhuruar Teutës një biletë për në turin e tretë, ku do të përballen me irlandezët e Shamrock Rovers.
/syri.net/
