Nga Klodian Tomorri
Përfundimisht është bërë shumë usta!
Doli para mediave dhe foli për krizën e rëndë. Shpalosi planin me tre pika, ku dy nga pikat ishin s’do ketë kufizime dhe nuk do ketë rritje të çmimit për familjet dhe biznesin e vogël. Domethënë dy nga pikat e planit ishin që nuk do bëjmë asgjë.
Mediat i peshkoi. Të gjithë u lëshuan me titujt lehtësues; kryeministri jep lajmin e mirë, nuk ka rritje çmimi energjie për familjet dhe biznesin e vogël etj., etj. Fitore e madhe me një fjalë.
Askush nuk bën pyetjen më të thjeshtë dhe logjike të mundshme; mirë për familjet dhe biznesin e vogël s’do rritet, por me biznesin e mesëm dhe të madh çfarë do ndodhë?
Së dyti, çfarë nënkuptohet me biznes i vogël, se këtu është bërë një lëmsh i madh me kategorizimin e biznesit që nuk merret vesh më. Pra, ku do të fillojë kërbaçi?
Tani ajo që nuk kuptova unë, është kjo:
Do rrisë çmimin direkt për të gjitha bizneset me xhiro mbi 10 milionë lekë në vit.
Do rrisë çmimin direkt për biznesit me xhiro mbi 14 milionë lekë në vit?
Do e rrisë vetëm për ata që janë të lidhur në tensionin e mesëm?
Apo do i nxjerrë jashtë nga furnizimi i rregulluar për të bërë rritje të fshehtë, që kur të kthehen tek furnizuesi fundor, domethënë OSHEE, t’u kërcasë 300 lekëshi për kilovat ballit?
Nga 1 janari, një nga këto katër skenarët sipër është ngjarje e sigurtë me probabilitet 1. Më pas pyetjet vazhdojnë:
Kur t’u rritet këtyre bizneseve çfarë do ndodhë?
Do ia përcjellin konsumatorit në çmimet e produkteve apo shërbimeve që ofrojnë?
Apo do dalin nga tregu, për shkak se do mbyten nga konkurrenca e bizneseve të vendeve të tjera fqinje, të cilat e kanë koston e energjisë shumë më të ulët.
Nejse. Mediat i peshkoi. Kjo ka rëndësi. Për ca ditë titujt do jenë kështu: “Rama jep lajmin e mirë, nuk ka rritje çmimesh”.
Ndërkohë, ju të biznesit të mesëm dhe të madh kapni garuzhdet të hënën dhe tek sheshi, se e hëngrët shkopin.
Ah se harrova, edhe një pyetje të fundit. Meqë kemi një javë në krizë energjie, ministren e energjisë e di njeri ku është? Se të gjithë po flasin për krizën e energjisë, përveç ministres që e ka detyrim ligjor administrimin e këtij sektori. Ajo di gjë për këtë planin apo jo se ajo do e zbatojë këtë.
