Një ndër çështjet më të rënda të kronikës së ditëve të fundit, është ajo e përdhunimit të së miturës 13-vjeçare nga Kavaja, nga 14 minorenë të tjerë, duke e shantazhuar me një video intime që i dashuri i vajzës kishte me të.
Rasti i rëndë u bë publik nga ish-kryeministri Sali Berisha me anë të një denoncimi në rrjetet sociale, ndërsa shprehej se ky krim i rëndë ishte mbajtur i fshehur nga Policia e Shtetit.
Pas 5 ditësh nga publikimi i këtij rasti nga ish-kryeministri Sali Berisha ka reaguar edhe Policia e Shtetit, e cila shprehet se janë kryer të gjitha etapat ligjore për rastin në fjalë, por nuk është bërë njoftimi mbi rrethanat e ngjarjes, për shkak të kërkesës së të ëmës së vajzës dhe vetë kësaj të fundit.
“Me kërkesën e të dëmtuarës dhe të ëmës dhe duke marrë në konsideratë interesin më të lartë të fëmijës, si dhe në zbatim të dispozitave të Ligjit Nr. 37/2017 “Kodi i Drejtësisë Penale për të Mitur”, e konkretisht: Neni 10 “Parimi i interesit më të lartë të fëmijës” -“Organet kompetente në çdo vendim dhe veprimtari të ndërmarrë në zbatim të këtij Kodi, duhet të vlerësojnë me përparësi interesin më të lartë të të miturit”.
Nenit 21 “Mbrojtja e jetës private të të miturit”, Paragrafëve 2 dhe 4, ku përcaktohet se:
– Nuk publikohet asnjë informacion që mund të çojë në identifikimin e të miturit në konflikt me ligjin, të të miturit viktimë ose dëshmitar i një vepre penale.
– Ndalohet identifikimi ose publikimi në çfarëdolloj forme i të dhënave personale të të miturit, me përjashtim të rasteve të parashikuara në legjislacionin për mbrojtjen e të dhënave personale.
Policia e Shtetit, nuk ka bërë njoftim mbi rrethanat e detajet e ngjarjes, por në raportin ditor ku pasqyrohen ngjarjet e datës 02.02.2019, ka pasqyruar shumë shkurt pa të dhëna e detaje ekzekutimin e masave të sigurisë dhënë nga Gjykata”, – shprehet policia.
