Nga Gjergj Marku*
Mjafton për të analizuar dy rastet e fundit megafestive në mediat kombëtare; të një emisioni që kishte zaptuar gjithë sheshin “Nënë Tereza” në Tiranë (siç nuk ka ba vaki me asnjë media të këtij GLOBI) dhe tjetri në një përvjetor televizioni, ku ishin vënë në rrjesht për të bërë adetet e rastit personalitetet më të larta të Shqipërisë dhe Kosovës, politikanë dhe më të kamurit e këtij vendi, natyrisht përzier dhe me sfilatat e femrave sharmante të showbiz-it shqiptar, ku shquhej llamburitja marramendese e luksit me të tana format e veta, për të kuptuar se në shërbim të kujt është media e sotme!
Po pyesja veten: në gjithë këtë sfilatë marramendëse, po publiku ku është, sepse qëkur u krijua ajo qëmoti, thuhej “në shërbim të publikut”?!
Më se paku, të shihnim gazetarë dhe reporterë që rropaten ditë-natë deri në prodhimin e lajmeve që shumica mbahen në punë për një “krodhe buke”, por jo, ata lihen në paskuintë si shërbëtorë të pronarëve të “media-luksit”, që i bën temena politikës dhe pushtetit, aty ku zengjinët “vjelin” llokmen e majme dhe natyrisht, u shërben me devotshmeri të lartë siamezëve të pushtetit. Për fat të keq, publiku nuk ka media! R.I.P Pushtetit të katërt!
(Fotoja ilustruese e shkrimit, e bërë në një shërbim mediatik në Malësitë e mbuluara me dëborë)
*Marrë nga Facebook-u i Gjergj Markut
