Parlamenti Europian ka miratuar me shumicë votash, kërkesën e eurodeputetit Eduard Kukan, për t’u kërkuar autoriteteve shqiptare ndëshkimin e fajtorëve për ngjarjen e 21 Janarit 2011.
“Keqardhje që autoritetet kompetente nuk kanë bërë një ndjekje penale efektive, ndaj i ftoj për të dhënë drejtësi, pa vonesë, mbi viktimat e ngjarjeve të 21 Janarit 2011”, u shpreh Kukan.
Eurodeputetët rrëzuan amendamentet që ishin hartuar nga kolegët grekë dhe ata bullgarë, mbi çështjet e pronave, detin dhe kishat, ndërsa u shpreh çudi për ekzistencën e pakicave kombëtare bullgare në Shqipëri.
Gjithashtu janë votuar me shumicë votash amendamentet që kanë të bëjnë kryesisht me luftën ndaj korrupsionit, duke instaluar në Shqipëri një sistem të ri drejtësie, nëpërmjet rivlerësimit të gjyqtarëve dhe prokurorëve aktualë.
Ndër amendamentet ra në sy amendamenti 83 i një grupi deputetësh, i cili u kërkon autoriteteve të përfshijnë në votime rreth dy milionë shqiptarë që jetojnë në emigracion.
