Studiuesi, albanologu dhe përkthyesi kanadez Robert Elsie në gamën e gjerë të veprave të tij ka pasur në fokus edhe çështjen çame.
Përmes një deklarate për mediat Partia Drejtësi, Integrim dhe Unitet shpreh mirënjohjen e përjetshme të shqiptarëve të çamërisë ndaj njërit prej albanologëve më të mëdhenj bashkëkohor si dhe i kërkon autoriteteve të angazhohen për të plotësuar amanetin e tij të fundit.
Deklarata e PDIU
Humbja e Robert Elsie është një humbje e madhe për kombin shqiptar dhe për memorien tonë. Ai ka qenë një ndër albanologët më të mëdhenj bashkëkohor, por, njëherazi, edhe një ndër shqiptarofilët më të mëdhenj të të gjithë kohrave. Puna e tij në fushën e albanologjisë dhe angazhimi i tij për çështjet e kombit shqiptar janë një kontribut që do t’i mbijetojë kohrave. Partia Drejtësi, Integrim dhe Unitet ngushëllon familjarët e Elsie për këtë humbje të parakohshme dhe i kërkon autoriteteve shtetërore që të angazhohen për të plotësuar amanetin e tij të fundit, që të prehet përherë në Shqipëri, si një shqiptar i vërtetë në zemër. Vepra e tij për të ndërkombëtarizuar çështjen çame, nëpërmjet një prej botimeve të tij të viteve të fundit, me përmbledhje dokumentesh mbi çamërinë në anglisht, i bën shqiptarët e çamërisë mirënjohës përjetë ndaj tij. U prehtë në paqe!
