Dega e Partisë për Drejtësi, Integrim dhe Unitet (PDIU) Durrës ka prezantuar ditën e djeshme strukturën e saj të re organizative
Në një takim me aktivistë të PDIU-së në Durrës, Kryetari Krenar Lasko ka prezantuar ditën e djeshme strukturën e re organizative të kësaj partie. Lasko theksoi se kjo strukturë është hartuar dhe përzgjedhur me kujdes me qëllimin për të zhvilluar një fushatë zgjedhore të suksesshme në zgjedhjet parlamentare të 18 qershorit.
E pranishme në takim ishte edhe deputetja e PDIU-së Mesila Doda e cila është shprehur se PDIU vazhdon të jetë e patundur në qëndrimet e saj për miratimin e një rezolute në parlament për genocidin e ushtruar ndaj popullsisë çame. Deputetja ka shtuar se kjo forcë politike është mjaft e organizuar dhe se kjo gjë do të reflektohet në zgjedhjet e 18 qershorit.
Struktura është prezantuar në prag të zgjedhjeve, në të cilat PDIU hyn me ambicie të forta për të nxjerrë të paktën një deputet për në parlamentin e ardhshëm. Kjo ambicie bazohet në forcën dhe mbështetjen që komuniteti çam ka në Durrës, i cili pritet që të bashkohet për të votuar listën që mendohet të nxjerrë emrin fitues për zgjedhjet e ardhshme.
Burime jozyrtare nga PDIU kanë bërë të ditur se me shumë mundësi në krye të listës pritet të jetë kryetari i saj Krenar Lasko, ndonëse kjo kandidaturë pritet të konfirmohet edhe zyrtarisht gjatë javëve të ardhshme. Z. Lasko ka riorganizuar degën lokale të PDIU-së në dy vitet e fundit dhe mendohet se është një emër bashkues për të gjithë komunitetin çam në mënyrë që votat të shkojnë të gjithë në favor të kandidatit të tyre.
Të pranishëm në takimin me aktivistë ishin edhe nënkryetari Gilbert Sulejmani, Artan Sulejmani, Tahsim Besho, Edmond Bejko etj.
