Një stuhi në gotë ka nisur pas një sondazhi të shpallur mbrëmjen e djeshme. Lajme dhe deklarata të paqena janë publikuar në shtypin e ditës, ndërsa rezultatet e sondazhit janë të çuditshme, por me to nuk merret askush.
Analiza e tyre, tek e fundit shihet dytësore dhe më së shumti ushqim për audiencën e televizionit që i organizon. Gjithsesi, bën përshtypje që partia e Blushit rezulton në Tiranë me 6 %, Sfida 1.5 dhe PDIU vetëm 1 %.
Kjo do të thotë që nëse sondazhi është i saktë dhe jo një hamendësim për të gjetur të vërtetën, duhet të pranojmë që në Qarkun e Tiranës, PDIU merr vetëm 3000 vota, aq sa mbledh në një miting, ndërsa anëtarë të rregjistruar vetëm në kryeqytet ka 6000. Në fakt, rezultatet e kësaj partie (jo sondazhet) kanë qenë përherë në rritje. Nuk bëhet fjalë për një forcë politike të re në gara elektorale, por për një parti të konsoliduar, e cila në rezultatin e saj fillestar vetëm në qytetin e Tiranës ka patur 9500 vota. Projeksionet e sotme pesimiste të PDIU-së flasin për 30 mijë vota në të gjithë qarkun, pra në Tiranë, Vorë, Kavajë, Rrogozhinë dhe fshatrat.
Atëherë përse ndodh një gjë e tillë?
Kjo ka shumë pak rëndësi, teksa po zhvillohet një fushatë elektorale. Po kaq të parëndësishme janë kombinimet politike që duan të realizojnë organizatorët e sondazhit dhe të tjerë. E vetmja gjë që ka rëndësi, kur një sondazh nxjerr të dhëna të këtilla është paniku që mund të përhapet tek zgjedhësit. Të tjerat janë të dorës së dytë.
Por, kjo nuk ndodh për herë të parë. E njëjta kompani katër vjet më parë e nxirrte Frymën e Re Demokratike 4.8 %, Aleancën Kuq e Zi 4.8 % dhe PDIU-në vetëm 1.5 %. Asnjëra nga partitë që dolën mirë në sondazh nuk bëri dot numra për deputetë, kurse PDIU fitoi pesë deputetë.
Tetë vjet më parë sondazhet e jepnin në shifrat e sotme të Blushit, G 99-tën, por ajo mori vetëm 0.99 % ditën e zgjedhjeve.
Ndaj, paniku, por mbi të gjitha lajmet e rreme që janë vendosur në gojën e Shpëtim Idrizit janë punë e kotë. PDIU dhe gjithë partitë e tjera duhet të vazhdojnë fushatën me të dhënat e tyre, projeksionet e tyre, të cilat janë shumë të sakta se kompanitë e sondazheve.
Dihet që herën e dytë të sondazhit ka për të rënë disi Libra dhe ato parti që u shfaqën në avantazh dje. Herën e tretë po ashtu, në mënyrë që afër zgjedhjeve të ketë një rezultat më afër të vërtetës. Megjithatë, kjo nuk është një mënyrë etike, por një rrugë për të ushtruar presion mbi votuesin e lëkundur.
Ndoshta ka ardhur koha që PDIU, por dhe parti të tjera të kërkojnë zyrtarisht nga organizatorët që mos të bëhen pjesë e sondazheve të tyre. Këto rezultate shkaktojnë vetëm tollovi dhe shpenzojnë energji të kota në një fushatë, e cila deri tani po zhvillohet e qetë dhe pa tension.
