Partia për Drejtësi, Integrim dhe Unitet përshëndet fitoren e LVV-së, z. Albin Kurti dhe znj. Vjosa Osmani, dhe uron që ky koalicion i erës së re që po fryn në Kosovë të ketë një mazhorancë sa më solide.
PDIU shprehet se këto zgjedhje janë shembull për Shqipërinë, që vuan ende nga autoritarizmi dhe mosgarantimi i një procesi zgjedhor me integritet, që mbron dhe respekton votën e lirë.
Deklarata e plotë
Partia për Drejtësi, Integrim dhe Unitet përgëzon popullin e Kosovës, institucionet dhe klasën e saj politike për shpalosjen e vlerave demokratike dhe të besimit te vota e lirë, në zgjedhjet e 14 shkurtit.
Dalja e qytetarëve në votime, numri i madh i votave të Diasporës dhe mbarëvajtja e procesit zgjedhor janë tregues të konsolidimit demokratik të Kosovës dhe ogur i mirë në udhën e saj të integrimit Euro-Atlantik.
Këto zgjedhje të parakohshme parlamentare ishin një ushtrim demokracie dhe verifikim i vullnetit mbarëpopullor për një shtet të së drejtës dhe luftë kundër korrupsionit. Ato janë shembull për Shqipërinë, që vuan ende nga autoritarizmi dhe mosgarantimi i një procesi zgjedhor me integritet, që mbron dhe respekton votën e lirë.
PDIU përshëndet fitoren e LVV-së, z. Albin Kurti dhe znj. Vjosa Osmani, dhe uron që ky koalicion i erës së re që po fryn në Kosovë të ketë një mazhorancë sa më solide. Mirëpresim bashkëpunimin me qeverinë, që do të dalë nga kjo votë demokratike dhe do të punojmë për thellimin e bashkëpunimit dhe krijimin e mundësive të reja për bashkimin ekonomik dhe shoqëror të Shqipërisë me Kosovën.
