Alibeaj: Të paprekshëm si njerëzit e Tahirit, jane jo vetëm familjarët e tij, po dhe bandat, trafikantët, rrëmbyesit, grabitësit, e sidomos habilajt, kordinatorët kombetarë të drogës në vend
Partia Demokratike denoncoi sot shkarkimin e 7 oficerëve të policisë të cilët janë pezulluar nga puna për shkak të konfliktit që patën me kunatin e ministrit të brendshëm Saimir Tahiri. Kreu i Departamentit të Rendit e Sigurisë në PD, Enkelejd Alibeaj, deklaroi sot nga selia e kësaj partie se policët u flakën në rrugë pasi kaluan vijën e kuqe. “ U flakën sepse reaguan ndaj kunatit të Saimir Tahirit, i cili, iu versul policëve me arrogancën tipike të familjarëve të qeveritarëve me pretekstin se po i prishnin qetësinë dhe relaksin në lokalin e tij. Paçka se policia gjendej aty ne një aksion e sinjalizuar për praninë e një personi të armatosur. “Sepse Tahiri dhe kunati i tij janë përtej vijës së kuqe, ata janë të paprekshëm. Të paprekshëm si njerëzit e Tahirit, jane jo vetëm familjarët e tij, po dhe bandat, trafikantët, rrëmbyesit, grabitësit, e sidomos habilajt, kordinatorët kombetarë të drogës në vend. Përtej vijës së kuqe dhe të paprekshëm e shohin veten Tahiri e Rama me përgjimet e tyre të paligjshme dhe presionin kriminal ndaj Prokurorisë e gjykatës kur nis hetimi ndaj tyre.”
Alibeja thotë se kemi të bëjmë me dy standarde të dëshmuara haptazi “ku për dhunën e shëmtuar e brutale ndaj një biznesmeni të rregullt e djalit të tij s’merret asnjë masë, madje pas denoncimit publik vazhdon përndjekja e metejshme ndaj tij, ndaj aktivitetit të tij, dhe nga ana tjetër, për një reagim ndaj kunatit të Saimir Tahirit teksa policia gjendej në aksion, hidhen në rrugë 7 policë, këto dy lloj standardesh janë fytyra e vërtetë e qeverisë, e Tahirit, e Ramës, e kësaj oligarkie që po sundon prej tre vitesh”. Kreu i Departamentit të Rendit e Sigurisë e mbyll deklaratën e tij duke thënë:Kjo padrejtësi bashkë me burimin e saj që eshtë qeveria, janë drejt fundit.
