Partia Demokratike vazhdon të dënojë dhe denoncojë thirrjet për protesta të dhunshme që bëhen nga ish-kryeministri Sali Berisha. Zëdhënësja e Partisë Demokratike, Ina Zhupa ka publikuar një video në rrjetin social “Facebook” të ish-kryeministri Sali Berisha, ku sipas saj ai vazhdon thirrjet për dhunë. Sipas Zhupës, shumica dërrmuese e demokratëve refuzoi ftesën e tij për gjakderdhje në 8 janar. Ajo thekson se për demokratët Berisha është e shkuara,
“Thirrjet e vazhdueshme të Berishës për dhunë nuk përfaqësojnë demokratët. Shumica dërrmuese e demokratëve refuzoi ftesën e tij për gjakderdhje në 8 janar, duke e braktisur atë në përpjekjen e tij për të shkatërruar Partinë Demokratike për interesa personale.
Për demokratët Berisha është e shkuara, koka e një pakice të dhunshme që nuk ka më vend në Partinë Demokratike”, shkruan Zhupa. Kujtojmë se në takimet e fundit që ka patur në Lezhë dhe Shkodër Berisha ka paralajmëruar se do të ketë protesta edhe më të mëdha se 8 janari.
