Boçi: Testimi është thjesht politik, në kundërshtim me ligjin dhe shkel çdo rregullore për vlerësimin e mësuesve
Kreu i Departamentit të Arsimit në Partinë Demokratike, Luciano Boçi ka akuzuar kryeministrin Edi Rama dhe ministren e Arsimit, Lindita Nikolla, se po i detyrojnë mësuesit t’i nënshtrohen një testimi politik dhe aspak të nevojshëm. Sipas tij, testimi është në kundërshtim me ligjin dhe shkel çdo rregullore për vlerësimin e mësuesit. Boçi u shpreh se testimi është veprimi i radhës i qeverisë për të poshtëruar mësuesit.
“Ligji shkel çdo kod moral, etik e ligjor, për vlerësimin e punës së mësuesit. Rama dhe Nikolla, kanë gati tre vite që i kërcënojnë ata, i poshtërojnë, i nxjerrin gjuhën, i mashtrojnë, i transferojnë, i pushojnë sipas interesit, sipas klientelës, sipas bindjes politike.
Pasi i hoqën pa pikë përgjegjësie dhe morali pagën e 13-të, pasi i mbajtën varë për një vit, pa kontratën kolektive të punës, pasi i listuan në gusht, pabesisht, sipas përkatësisë partiake, në bazë të fakteve të denoncuara në këtë foltore, pasi i kërcënuan me vendin e punës për ti marrë votën, siç përcaktoi dhe raporti i OSBE-ODIHR-it, shpikën më në fund dhe këtë testim”, tha Boçi.
