Deputetët e Partisë Demokratike në Komisionin e Shëndetësisë kanë thirrur në një seancë urgjente Ministrin Ilir Beqaj për të dhënë shpjegime rreth rritjes së fashës së check up-it.
Kryetarja e këtij Komisioni, Albana Vokshi, tha se kryeministri Rama dhe Beqaj pranuan publikisht dështimin e check up-it ashtu siç pranuan edhe shpërblimin me 5 milionë euro për donatoren Vilma Nushi. Vokshi përsëriti dhe thirrje drejtuar Prokurorisë për të hetuar këtë aferë korruptive.
Nga ana tjetër, Ministria e Shëndetësisë reagoi pas akuzave të PD për rritjen e fashës së check up-it, duke e cilësuar selinë blu si armiken më të madhe të kontrollit shëndetësor falas.
Sipas Ministrisë, dje PD akuzonte qeverinë se po shpenzonte më shumë. Sot, që kuptoi se nuk do të shpenzohet asnjë qindarkë ekstra, por përkundrazi, për të njëjtin buxhet do të përfitojnë më shumë qytetarë, më shumë kontrolle falas.
Gjithashtu, Ministria e Shëndetësisë i bën thirrje çdo qytetari të moshës 35-70 vjeç, t’i drejtohet qendrave shëndetësore për të përfituar kontrollin shëndetësor falas për të parandaluar sëmundje e për tu kuruar në kohë.
