Ditën e sotme u mblodh Kuvendi Kombëtar i Partisë Demokratike, ku u morën një sërë vendimesh. Fillimisht u vendos që Enkelejd Alibeaj të shkarkohej si kreu i Grupit Parlamentar, si dhe u mor vendimi që zgjedhjet për kryetarin e ri të zhvilloheshin në 22 Maj. Më pas u votua për anëtarësinë e Këshillit Kombëtarë të PD, lëvizje këto që njëra pas tjetrës po “shkatërrojnë” grupin e Bashës në PD.
Por edhe ky i fundit nuk ka ndenjur duar kryq, por ka bërë lëvizjen e tij të radhës. Mësohet se ditën e sotme Lulzim Basha ka udhëtuar drejt Sarandës, ku ka zhvilluar një takim me simpatizantët dhe mbështetësit e tij. Ai nuk mori pjesë në Kuvend pavarësisht se iu dërgua ftesa, ndërkohë që është shprehur se po i zhvillon këto takime në disa qytete për të shpjeguar dorëheqjen e tij dhe për të bashkuar demokratët.
