Partia Demokratike ka mbledhur sot grupin parlamentar. Burime nga PD deklarojnë se ka patur negociata për të vendosur nëse do të marin pjesë në komisionin e posaçëm për reformën në drejtësi, por pa rezultat.
Partia Demokratike mbetet e vendosur për të mos lëvizur nga rekomandimi 88 i Komisionit të Qeverisë për “vendet e rezervuara”. Burime nga selia blu bëjnë me dije se ky është qëndrimi zyrtar i PD. Sipas Bashës ky parim është zgjidhja për një sistem drejtësi të pakapur nga politika.
Ai tha se demokratët mbështesin në parim paketën e ndryshimeve kushtetuese, por me kushtin që të adoptohet rekomandimi 88 i opinionit final të Komisionit të Venecias.
“Grupi parlamentar i PD ka dalë me vendim të mbështetjes së miratimit të draftit të ndryshimeve kushtetuese të reformës në drejtësi me një kusht, adoptimin dhe zbatimin e plotë të rekomandimit 88 të opinionit final të Komisionit të Venecias, me moskapjen e sistemit të drejtësisë.Moszbatimi i plotë i rekomandimit 88 të proçesit të skanimit të gjyqtarëve dhe prokurorëve do të thotë të dorëzosh drejtësinë jo tek një njeri dosido por tek Edi Rama që i quan killer gjyqtarët që hetojnë skandalin e përgjimit. Ka frenuar deri më sot zbardhjen e skandalit të firmës nga Erion Veliaj, që ndërpreu çështjen penale në ngarkim të Sajmir Tahirit për narkotaksinë e lidhur me Habilajt dhe që u bën fresk atyre që në vend që ta ndiqnin penalisht dhe ta çonin para drejtësisë Shullazin, Habilajt, Hakmarrjen e dhjetra banda të tjera që bëjnë ligjin nga mëngjesi deri në darkë, ju bën fresk gjithë ditën duke i siguruar akses në një drejtësi të shantazhuar politikisht.”-tha Basha.
Basha ka ritheksuar kërkësën e opozitës duke thënë se nuk është një kusht i PD, por një zotim që ka bërë vetë kryemintri para ndërkombëtarëve.
“PD ka një dhe vetëm një kërkesë që në fakt është zotimi im dhe zotimi i i Edi Ramës në Bruksel dhe Uashington. Zbatimin e plotë të rekomandimit 88 të Venecias, zbatimin e plotë të opinionit final të Venecias. Nuk kemi asnjë kërkesë tonën dhe as një kusht tonin.Adoptim të plotë jo të pjesshëm rekomandimit 88 të ‘Venecias’. Nëse pala tjetër bie dakord jemi gati ta votojmë në parim që sot draftin kushtetues. Nëse nuk bie dakord tungjatjeta, kur të bien dakord”-thekson ai.
Dje kryeministri Edi Rama i bëri ftesë opozitës të bëhet pjesë e mbledhjes së komisionit të posaçëm për reformën në drejtësi ku mirëpriten të japin idetë e tyre. Pika ku palët kanë rënë në dakordësi ka të bëjë me vendet e rezervuara.
