“Sharës me dhe pa pagesë”, kështu iu është drejtuar deputeti i Partisë Demokratike, Astrit Patozi, të gjithë atyre që siç ai thotë po përdorin kandidimin e tij si shkas për t’i qëndruar afër kryetarit të vetëngrirë.
Me anë të një postimi në facebook, Patozi shkruan se ata duhet t’i dalin përkrah Bashës në këtë moment të vështirë që të mos ndihet vetëm në dënimin që i ka bërë PD-ja.
Postimi i plotë
Për sharësit me dhe pa pagesë
Kam mirëkuptim për të gjithë ata kolegë, ish-kolegë, miq, ish-miq dhe asnjëherëtakuar, që po përdorin kandidimin tim si shkas për t’i qëndruar afër kryetarit të vetëngrirë. Dilini në krah në këto momente të vështira, pasi duhet të mos ndjehet vetëm në dëmin, që i ka bërë PD. Lehtësojani sadopak ndërgjegjen duke marrë përsipër një pjesë të mëkatit të tij.
Vazhdoni e bëjeni dhe kini mirëkuptimin dhe nënvlerësimin tim.
Tek kjo “amnisti” nuk përfshihen sharësit me pagese të kompanisë së posaçme call center, ndonëse qëllimi mund të jetë i njëjtë.
Por një këshillë e kam: thoni ç’të doni kundër meje, vetëm ju lutem bëni kujdes mos përplaseni me njëri-tjetrin, kur të prisni në paradhomë, pasi të keni kaluar skanerin e kunatit.
Mes jush, që e bëni vullnetarisht, dhe mercenarëve, që e bëjnë me lekë, juve më dhimbseni me shumë.
Suksese të gjithëve!
